Kartlegging av trua naturtypar

Slåttemarka i Brudavolltunet i Ørsta er ein av lokalitetane av trua naturtypar statsforvaltaren i Møre og Romsdal skal kartlegge i år.

– Dette er gledelege nyheiter og avgjerande for vårt arbeid med slåtteenga framover, seier Magnhild Vatne og Cecilie Rørstad, ansvarlege for kulturlandskap i Viti, som driv Brudavolltunet.

Det er viktig for oss å samarbeide med statsforvaltaren i vårt arbeid med å forvalte og utvikle Brudavolltunet. Slåttemarka er ein sentral del av den historiske garden og slik også museet si formidling av landbruk og matproduksjon i fortid og notid.

Det å få kartlagt enga og deretter utarbeide skjøtselstiltak som tek vare på og styrkjer dei viktige engvekstane og reduserer bestandane av artar som ikkje høyrer til i slåtteenga, er av stor verdi.

Kartlegginga vil gje oss meir kunnskap om og oversikt over kva artar som veks i enga. Dette vil vere ein del av museet si formidling av det lokale artsmangfaldet og verdien av å forvalte sårbare slåtteenger som dette på ein måte som tek vare på enga for framtida.

I desse dagar er Viti i gong med vårarbeidet på garden. Vindfall etter stormane i vinter vert rydda vekk og veitene vert reinska for å hindre flaum og skade på gardstunet. I den gamle hagen har staudene begynt å vekse. Desse har vi markert for at dei skal verte lettare å sjå når lauv og kvist etter kvart skal fjernast her.